Gipuzkoa irudikatuz

Atzo Etorkizuna jokuan estreinatu genuen, etorkizuneko ikuspegi eta joeretan modu ludikoan pentsatzeko Gi2030ek asmatutako jokoa. Sitrak (Finlandiako berrikuntza-agentzia) argitaratutako mega joeretako kartetan inspiratuta, jokoak tokiko eskalan bost esparrutan antolatzen diren etorkizuneko tendentziak lurreratzea bilatzen du: natura, teknologia, boterea, pertsonak eta ekonomia. Dinamika arin eta erraz baten bidez, Etorkizuna jokuan mega joerako karta baten inguruan orbitatzen duten kezkak, esperientziak edo hausnarketak komunean jartzea sustatzeko pentsatuta dago.

Azken asteetako sukalde lanaren ondoren, gogoak genituen proposamena testatzeko. Horretarako publiko pribilegiatua izan genuen: UPV/EHUko filosofiako 30 ikasle inguruk lehenengo partida egin zuten eta ideia zena mugimenduan jarri. Beren eskoletatik sartu eta irteten ziren ikasleek jakin-minez begiratzen zioten pasilloan bildutako ikasle taldeari, Gipuzkoa itxurako taula baten inguruan batuta eta eskuan garbantzu batzuk zituztela. Horrela hasten zen jokoa: 5 talde lehiatzen ziren ahalik eta puntu gehien lortzeko, hautatutako kartak planteatutako joerari ikuspegi baten bidez erantzuna emanez. Joko guztietan bezala, zoriak eta estrategiak talde bakoitza lauki batetara eramaten zuten. Laukiak txanda bakoitzean jokatu beharko zuten mega tendentziaren kolorea adierazten zuen.

Gai erabakigarriak, hala nola, negazionismoa eta larrialdi klimatikoa, digitalizazioak lan egiteko moduetan duen eragina, sistema ekonomikoa eta aberastasunaren banaketa, edo gobernuen esku hartzea kultur aniztasunaren arloan, modu konplexuan landu ziren, testigantza pertsonalak, usteak, gogoeta lurreratuak edota eztabaidarako argudioak plazaratuz. Honekin, partidak iraun zuen orduan egiaztatu genuen jokoak funtzionatzen duela... gehiago etorriko dira!