Gipuzkoa irudikatuz

Gi2030 festibalaren lehen edizioa uztaileko lehen bi larunbatetan egingo da Zegaman eta Itziarren (Deba). Hitzaldi inspiratzaile eta talde-dinamiken bidez, Gipuzkoa Irudikatuz 2030 (#Gi2030) proiektuaren esparruan antolatutako jardunaldien helburua da unibertsitate kulturari eta lankidetza publiko-komunitarioari buruzko hausnarketa esparru akademikotik haratago zabaltzea, eta, aldi berean, ikaskuntza kolektiborako, esperientzian oinarritutako espazio/denbora atsegin bat sustatzea, Gipuzkoaren etorkizuna irudikatzeko.

Uztailaren 1ean eta 8an, Gi2030 festibalaren lehen edizioa ospatuko du Gipuzkoa Irudikatuz 2030ek Zegaman eta Itziarren. Hemen jaitsi dezakezu festibalaren afixa.

Antonio Casado #gi2030eko ikertzaile nagusiak dio “lurraldearen ikuspegi partekatua sortzea prozesu konplexua da. Hainbat metodologien bidez, lurraldearen erronkei buruz sortzen den ezagutza akademia, erakunde eta herritarrekin harremanetan jarri nahi dugu. Festibala abagune berri bat da 2030erako irudikatzen dugun Gipuzkoari buruzko elkarrizketak hasteko”.

Uztailaren 1ean, Festibalak unibertsitate kultura campusetatik haratago zabaltzea eta aberastea izango du helburu; uztailaren 8an, lurraldearen etorkizunak irudikatzea da asmoa.

Jaialdiaren lehen jardunaldia uztailaren 1ean izango da, 17:00etatik 20:00etara, Zegaman, eta unibertsitate kultura campusetatik haratago zabaltzea eta aberastea izango du helburu. Premisa horren pean, Iñaki Zabaleta Gorrotxategi irakasleak Joxe Azurmendiren bizitzaz eta obraz hitz egingo du. Ondoren, Bitoriano Gandiagaren poemen edizio elebidun berria partekatuko da, AKTIBA ikerketa taldeak Jakin Fundazioarekin elkarlanean egindakoa. Jardunaldiaren amaiera artistikoa Morau eta Beñardo musikarien eskutik etorriko da eta euren azken lana aurkeztuko dute: Ardo (Gaztelupeko Hotsak, 2022).

Larunbatean, uztailak 8, 17:00etatik 20:00etara, Jaialdiak bigarren jardunaldia ospatuko du Itziarren (Deba). Oraingo honetan, etorkizunak irudikatzea da ideia nagusia, Verena Hammes iraunkortasunaren eta eraldaketa sozialaren ekintzaileak emandako dinamika baten bidez. Ondoren, Mari Luz Esteban irakaslearen hitzaldia izango da, Haragizko erreformak (Pamiela, 2023) bere azken liburuko poemen bidez, lurraldearen eta bertako biztanleen iraganari, orainari eta etorkizunari begira. Uxue Pascual eta Maialen Velarde artistek saioaren laburpena egingo dute bertso eta gorputz adierazpenaren konbinazio artistiko batean.

Jaialdia doakoa da. Mesedez, eman izena antolaketa kontuak errazteko. Xehetasun zehatzagoak jasotzeko, helbide elektroniko honetan topatuko gaituzu: info@gi2030.eus.